Lávdegottis ášši gieđahallojuvvo soabadallanmeannudemiin dahje cealkináššin. Gieđahallanbivdaga vuođul lávdegoddi čielggada, leatgo áššis eavttut soabadallamii. Soabadallanmeannudeapmái oassálastin lea eaktodáhtolaš. Oassebeliid miehtama vuođul lávdegoddi nammada ovtta lahtu soabadallin veahkehit oassebeliid čoavdit ášši soabalaččat. Soabadalli ráđđádallá oassebeliiguin báikki alde ja veahkeha sin juksat soabadallančovdosa. Soabadallama vuođul juksojuvvon soahpamuš lea oassebeliide doallevaš. Gearretriekti sáhttá dárbbu mielde nannet soahpamuša ollašuhttingelbbolažžan.
Juos soabadallamii eai leat eavttut, ášši gieđahallojuvvo cealkámušáššin. Golbma lahtu čovdet cealkámušáššiid. Cealkámuša várás lávdegoddi doaimmaha dábálaččat geahčadeami ja skáhppo dárbbašlaš čilgehusaid ja áššegirjjiid. Ášši gieđahallamis ja čoavdimis čuvvojuvvo boazodoallolága lassin dat mii hálddahuslágas (434/2003), virgeoapmahačča doaimma almmolašvuođas addojuvvon lágas (621/1999), giellalágas (423/2003) ja sámi giellalágas (1086/2003) ásahuvvo.
Lávdegoddi ii gieđahala áššis daid osiid, main lea juo addojuvvon duopmostuolu čoavddus. Juos ášši lea gieđahallamis duopmostuolus, cealkámuša sáhttá addit dušše duopmostuoluide dan bivdaga vuođul. Juos soabadallanbivdda dahkkojuvvo dan maŋŋá, go cealkámušbivdda lea boahtán gieđahallamii, cealkámušbivdaga gieđahallan gaskkalduvvá soabadallanmeannudeami boddii.
Lávdegoddi ii leat doaibmaválddálaš gieđahallat bohccuide guoski johtolatvahágiid, boraspire- dahje beanavahágiid.
Lassidieđut
čálli Kaisa Kauppinen tlf. 029 520 4631
sátnejođiheaddji Ahti Kontturi tlf. 050 473 1051